PROPOSTA PARA O XOVES 26 DE MARZO

DIARIO DE NAVEGACIÓN 9

-ARGALLANDO COA TRIPULACIÓN

Para navegar no noso barco precisamos moita xente. Estades dispostos a enrolar uns amigos moi especiais na vosa tripulación?. 

Fran Pena, pai da aula de 3, e veterano xa na nosa familia educativa, comparte connosco estes debuxos da súa autoría para que  poidamos desfrutar cunha proposta moi orixinal  e feita especialmente para todos nós.

Hoxe temos dúas alternativas diferentes para adaptarnos a tódalas situacións e cousas que teñamos na casa. Podedes facer unha das tarefas ou as dúas. Cada quen como vexa...

1/Imos FACER UNS XOGUETES con estes personaxes. Imprimide o modelo sen roupa (que está no pdf) e as distintas prendas, recortádeas e pegádeas nun cartón ou cartolina. Na foto superior tedes os modelos.  Xa tedes un xoguete co que entretervos varios días!. 

Podemos...

XOGAR A VESTIR A...

Ponlle un nome o teu personaxe! e cámbiao de roupa canto queiras.

XOGAR COS BONECOS FEITOS

Cos distintos personaxes poderás montar as túas propias historias.  Onde van ir , que cousas teñen que facer, .... Coas contrucións que teñas na casa monta un barco ou  un porto e deixa voar a túa imaxinación.

Tedes AQUI todo o necesario.

Non fai falta que imprimades todo, podedes escoller. E se non queredes imprimir en cor , deixámosvos os personaxes en blanco e negro para que os poidades colorear.

Pero, atentos!  Este non é un mundo de homes. Mañá poremos os personaxes femininos!

2/ A outra alternativa é  facer un boneco de cartón grande peza a peza. (Tamén podemos ir facéndolle o vestido a unha boneca das que tedes para xogar). Esta actividade vai durar varios días nos que iremos propoñendo distintas cousas. Ao final montaremos o boneco.

Hoxe toca facer as BOTAS DE AUGA. Collede un cartón, debuxade unhas botas de auga (os maiores poden axudar) e pintádeas como queirades. (Se ides vestir a boneca teredes que facelas do seu tamaño).

-NA NOSA MALETA FALTAN  TRES...

É un xogo de buscar. Imos procurar máis  cousas  para a nosa viaxe. Teredes que buscar 3 cousas cunha característica que vos digan na casa. Por exemplo, redondas, cadradas, grandes,  suaves, cun bo cheiro, das cores pedidas. Pero non podedes metelas na maleta se non explicades para que van servir na vosa viaxe. Os  que poidades escribide nun papel, os demáis a debuxar.!

-XOGO DO ESPELLO

Precisamos polo menos dous participantes neste xogo, aínda que poden ser moitos máis. Un deles vai ser o que dá as ordes: fará distintas posturas, xestos, movementos... e os demáis, os espellos, terán que imitalos e facer o mesmo movemento. Escollede música clásica ou instrumental que vos guste e... concentrádevos e a desfrutar.!